Ein bólkur úr NámX við eini verkætlan um at framleiða wasabi í Føroyum vann ársins árligu íverksetarakappingina millum fólkaskúlanæmingar. Tað varð kunngjørt fyri einum fullsettum sali í Norðurlandahúsinum
Fríggjadagin 27. februar 2015 var ein fullsettur stóri salur í Norðurlandahúsinum karmur um finaluna til SkúlaFM 2015.
Dómsnevndin valdi Faroe Wasabi, sum ein bólkur í NámX stóð aftanfyri. Verkætlanin gongur í stuttum út upp á at framleiða wasabi í Føroyum. Umstøðurnar í Føroyum eru sum skilst serliga góðar í Føroyum, og nógvir pengar eru at henta á útelendska marknaðinum.
Nummar tvey varð valdur Balizar Wave, sum ein bólkur úr Kommunuskúlanum stóð aftanfyri. Verkætlanin gongur út upp á at framleiða eina serliga boyu, sum gera okkurt við tann trupulleikan, at 300 túsund hvalir doyggja um árið, m.a. tí teir vevjast inn í fiskireiðskap.
Sum nummar try valdi dómsnevndin Alispælið, sum ein bólkur úr Skúlanum við Løkin stóð aftanfyri. Verkætlanin gongur úr upp á, at næmingar kunnu læra um alivinnu við einum telduspæli.
Tilsamans níggju bólkar vóru við í Finaluni hesuferð. Umframt teir, sum nevndir eru omanfyri, vóru
- ein bólkur úr Skúlanum við Løkin hevði eina verkætlan, sum eitur Netjan,
- ein bólkur úr NámX við eini verkætlan, sum eitur PureBox,
- ein bólkur úr Fuglafjarðar skúla, sum eitur Kjarnan,
- ein bólkur úr Eysturskúlanum við eini verkætlan, sum eitur Travel The Faroes,
- ein bólkur úr Felagsskúlanum á Oyrarbakka við eini verkætlan, sum eitur Grøna Leyva, og
- ein bólkur úr Ósaskúlanum við eini verkætlan, sum eitur Food in Air.
Í dómsnevndini sótu Jenny Lydersen úr Mentamálaráðnum, Óla Kristian á Torkilsheyggi, stovnari og eigari av Navia, og Heini Mohr Hermansen úr Føroya Tele.